Romans 3
Yu Epate Godotamo Nanitabo Tanalo Osiyodiloa꞉no Wiyasiya Ebete Ibino Nanidawama꞉ Beda꞉namene
1Ebema꞉ naimano tabo olowidawa, diyala, a꞉ma꞉le na ma kunu da꞉banana꞉emene, “Kebe lumagite a Yu epagodolo awokalate ebene baibai guduno tama itamida pukala delawiya, ebete ebe tanalodo beda꞉ wade tanalo kelawiyale? Da꞉ puliyala꞉, iyo, Godokono umi magumulo Yu epagodolo wade tanalo idite da꞉ kitana꞉.”2Nale wiyasiya negemo, “Ao, eba kunua꞉! Godote a Yu epo kowalubinama꞉ wadewade tanalo epetapi bilibilinomo atamo ikaeamiya, ebe tanalo magumulo dopo tanalo ebe ebeno Buka apuapuno tabo ikaeame tanalola.”
3Ebene a꞉ma꞉le na ma kunu walo da꞉bakanana꞉emene, “Numa꞉, a Yu epate Godotamo tudila꞉oa꞉no nanitabo tanalo kosiyodilolenakia꞉, ebema꞉ ebete dopamo a uwomua꞉ tetelo kowalubinama꞉ nanitabolo degiya, ebete ebe tabo walo a꞉kemalagidilomene, a, nanitabola꞉ka꞉?” a
4Nale wiyasiya na꞉kegemo, “Ao, Godokono tanalo eba kunua꞉. Me opo epo bilibilinomate a꞉da꞉ elemasigipima꞉ eba eda꞉onalo, ebe kapiyate nanidawanomoma꞉ beda꞉namene, ebema꞉ ebete kebe tabo dopamo nanitabolo kegiyale walone ebe tabo akadikamidalemene. Iyo, Godokono nanitabo tanalo awokalima꞉ ebeno Bukalo tabote ma kunu itana,
‘Godo, a꞉ma꞉ kebe tabo apuapu ka꞉kiyawawenaka,
walone tetelo epate ebe iyaiya tabono nanitabo tanalo kuima꞉na꞉,
ebema꞉ piyate a꞉ma꞉ a꞉da꞉dawama꞉ degelana,
a꞉imano wadewade osiyodilole tanalate
ibino daedale wokino tanalo ebo kawokalilaemene.’”
5Ebema꞉ diyala, lumagi idite me opo epono daedale wokiamo natamo ma kunu da꞉ba꞉wiyamene, “Godote aimano kuba osiyodilole mabuma꞉ wiya ikaeaema꞉ modoboa꞉, iyo, ebete eba kunu dowagelemene tuputupu tanalo akawokalimene. Numa꞉, ebete aimano kuba osiyodilole tanalodo wade tete ebe lawenako ebeno nilakapo tanalo awokaliminomo kawokalima꞉. Ebema꞉ mabu keleka꞉ ebete kuba wiya atamo walone ikaeaema꞉ degena? Ebete eba kunu dosiyodilomene, ebe tanalo ebe tuputupu tanaloa꞉, ebeno kuba osiyodilo tanalola.”
6Na wiyasiya ma kunu gemo, “Eiye! A꞉ma꞉le degeawa꞉, ebe tabo nanitaboa꞉! Godoko ebe tuputupu osiyodiloledawala, ebegodolo kuba osiyodilo tanalo idi puliyanomola. Ebema꞉ ebe kapiya modobonomola me opo epo bilibilinomono tanalo anagilamelelamete wiya iba꞉tamo ikalaema꞉.”
7Ebema꞉ diyala, daedale lumagi idite ma kunu da꞉ba꞉kegemene, “Godote naimano a꞉da꞉ elemasigi tanalodo wade tete ebe lawenako ebeno wade osiyodilo tanalo awokaliminomo kawokalima꞉. Iyo, eba kunu ebe a꞉ka꞉tuwa꞉ ebe walogonanako, ebema꞉ ebete epono tanalo danagilamelelaemene, ebe tetelo modoboa꞉ ebete na kuba osiyodilodawama꞉ gema꞉! 8Ebe mabuma꞉ kuba꞉ a me opo epate aimano ubilo kubakuba tanalo bosiyodilolenama꞉, mabu Godote aimano kuba osiyodilole magumune ebeno wade nilakapo tanalo eba wagaililo atamo kuba wiya a꞉kikaeaemene.”
Ebema꞉ na Polote na꞉kegemo, “A꞉ma꞉le kebako kuba daedale tabonomo degeawa꞉, a꞉da꞉ elemasigi epo epetapiate ebako tabo eba gelalo kuba tabo idi ma kunu kegelanaka, nale naimano iyatulame tanalago iba꞉go kapiyama꞉ eda꞉te atu tabo kegenamo. Eiye! Ebe a꞉da꞉ elemasigipiate ibino kuba tabono tanaloma꞉ Godogodone wiya modobolo kuwatema꞉na꞉!”
Me Opo Epo Bilibilinomate Kuba Osiyodilolepima꞉ Deda꞉ona
9Ebema꞉ la꞉ Yua꞉piate naimano Yu epono tanaloma꞉ beda꞉ woki na꞉kiyata꞉ema? Godokono umi magumulo Yu epono osiyodilole tanalo wadewadenodopola꞉ka꞉, ega꞉walo Yua꞉pino osiyodilole tanalo kubakubadopola꞉ka꞉? Ao, eba kunua꞉! Na me leta dopo apulo nanitabo tanalo ma kunu awokalimo, Yu epo ega꞉walo Yua꞉pi, ibi bilibilinomono watodawa ebe kapiyala, ebe ibi magumulo ditana ebe kuba osiyodilole tanalono elawo tanalola. b 10Ebe tanalo awokalima꞉ Godokono Bukalo tabo idite ma kunu itana,“Me opo kawonomolo kuba osiyodiloa꞉dawa puliyanomola,
iyo, tuputupudawa kapiya idi ka꞉luta꞉. c
11Ega꞉walo wade kimalagidilagodawa idi puliyala,
iyo, Godokono nanitabo gabo wadidawa kokolina꞉.
12Nanitabola, me opo epo bilibilinomate Godogodone olobila꞉ote,
kubakubanomoma꞉ eda꞉iya,
ebema꞉ wadewade tanalo osiyodiloledawa idi ka꞉luta꞉,
iyo, idi kapiya puliyanomola.
13Ebema꞉ epono tabo gela tanalo
ebe a꞉elaopino bobo keba kunula꞉ka꞉ eba kunula,
potele ebe bobo magumu da꞉iyamidamene
abale kapiya ebo kuimene.
Iyo, ibino menate a꞉da꞉ tabo gelanaka,
ebema꞉ elawo kaluno pako keba kunula꞉ka꞉,
ibino iyaiya tabono tanalo ebe eba kunula. d
14Nanitabola, iba꞉te dowaote
ibino tabo magumune malato tabo kawokawonomate pemaimionaka, e
15ega꞉walo iba꞉te ibino ubi tanalo kawonomamo alomonaka,
gawagawalo tolamelo epetapiatamo temeteme eba nikalamelo
epetapi gito kananakapulaema꞉. f
16Iyo, iba꞉te kebe iyaiya opamo da꞉tolamenaka,
ebolo epo eba na꞉kubailamelo
iba꞉tamo iyaiya mibomibo tanalo ebo nikalamenaka.
17Me tanalo nanitabola,
ibi nanitabo milo okoli tanalo iyatawa꞉,
18ega꞉walo iba꞉te ibino kuba osiyodilole mabuma꞉
Godokono elawo tanaloma꞉ ka꞉toletoleona꞉.” g
19Ebema꞉ a me kawo tanalo iyatawala, kebe epate Godokono Totomu Tabo dopamo dolowiya, ebe tetene wagilimite ebe iyaiya Totomu Tabote ibino watodawama꞉ gito ediya. Me mabuma꞉ Godote ibino tanalo danagilamelelaemene, ebe tetelo iba꞉te kuba wiya uwatelo ebe odiyoboma꞉ tabo idi gelama꞉ a꞉ka꞉modoboma꞉na꞉. Iyo, Godote eba kunu me opo kawonomolo dilukuliona ebe Yu epo ega꞉walo Yua꞉pi ibi bilibilinomatamo ibino kuba wiya modobolo kikalaemene. 20Ebema꞉ nanitabola, Godote ebeno Totomu Tabo epatamo dikalamiya, ebe tetelo ebete woki kiyatiya꞉ ebete Totomu ikalame gabodo lumagi idi tuputupudawama꞉ ka꞉midima꞉. Ao, ebete ebeno Totomu Tabo epatamo ikalamiya, ibi bilibilinomate ibino kuba osiyodilole tanalo wadenomamo kiyatawaoma꞉. h
Godote Epono Nanitabokobi Midi Tanalodo Ibi Ebeno Tuputupupima꞉ Da꞉midilinako
21Ebema꞉ Godote ebeno Totomu Tabono tanalamo lumagi idi tuputupudawama꞉ a꞉ka꞉midimene, wiyasiya ebete epo ebeno tuputupupima꞉ kebe tanalodo ka꞉midilinale, me tetelo ebete ebe tanalo atamo awokalimiya. Numa꞉la꞉, dopamo Mosesete ebe tanaloma꞉ nanitabonomolo degiya Godokono Totomu Tabo bukamo ebo akuloliya, iyo, Godokono woki awokalimipi epetapiate atu tanalonomoma꞉ kegelanakiya. 22Ebe tanalo ma kunula, piyate Ya꞉su Kelisoko nanitabokobi da꞉midima꞉na꞉, Godote ebe tanalodo ibi ebeno tuputupupima꞉ ka꞉midilimene. Iyo, me tetelo Godote Yu epo ega꞉walo Yua꞉pi ibi bilibilinomo kapimiya eba kunu ibino nanitabokobi midi tanalodo walubilinako, i 23mabu me opo epo bilibilinomate kubakuba tanalo osiyodilolete ibino ele gabo odidi tanalodo Godokono ololo apune mulunomamo a꞉tolamiya. 24Wiyasiya iba꞉te Godotamo wade tanalo idi osiyodiloa꞉ tetelo ebete ebeno nilakapo magumulo Ya꞉su Kelisokono woko tanalodo ibi tuputupupima꞉ ebo ka꞉la꞉miya. Iyo, Godote epono kuba osiyodilole tanalono elawo magumune ibi ma kunu wagailiya, j 25ibino kuba osiyodilole mabuma꞉ ebete Ya꞉suko kalimagono nilakapo inamabuma꞉ midite kewa olotolowalo gito a꞉iya. Ebema꞉ piyate Ya꞉sukono a꞉e tanalo nanitabokobi da꞉midima꞉na꞉, Godote ebe gabodo ibino kuba osiyodilole tanalo bilibilinomo egebolelamete ebo ka꞉dodolomatililaemene, nanitabola, ebete ebe gabo osiyodiliya ebeno tuputupu osiyodilo tanalo kawokalima꞉. Iyo, numa꞉la꞉, Ya꞉sute me opamo pea꞉no dopamo piyate dilukulionamiya, Godote ebeno nilakapo magumulo ibino kuba osiyodilole mabuma꞉ wiya iba꞉tamo nanitabolo kikalamenakia꞉, 26mabu ebe ubila ebeno tuputupu osiyodilo tanalo a tetelo nanitabolo awokaliminomo ma kunu kawokalima꞉, ebe kapiya tuputupudawama꞉ eba eda꞉nalo ebete epo bilibilinomo magumulo piyate Ya꞉suko nanitabokobi da꞉midima꞉na꞉ ibi atumu tuputupupima꞉ ka꞉midilimene.27Ebema꞉ ale tuputupupima꞉ eda꞉o tanalo eba malagidilolo amama tanalote agodolo akoitanala꞉, mabu ale aimano elawamo Godokono Totomu Tabamo tudila꞉o gabodo o wade osiyodilo tanalo idido walubi tanalo kelawiya꞉. Nanitabola, ale aimano wade tanalo osiyodiloa꞉ tetelo Ya꞉sukono osiyodilo tanalo kapiya nanitabokobi da꞉midiyama꞉, ebe gabodo ale Godokono tuputupupima꞉ eda꞉iyama꞉, 28iyo, a me tanalo kawonomo iyatawala, lumagite nanitabokobi midi tanalodo tuputupudawama꞉ keda꞉mene wiyasiya Godokono Totomu Tabamo tuduwata tanalodoa꞉. 29Ebema꞉ la꞉imano woki ma kunu kitanale, Godoko ebe Yu epo kapiyano Godola? Ao, Yua꞉pi ega꞉walo Yu epo, Godoko ebe ibi bilibilinomono kapiya Godola, ebema꞉ ebete ibi bilibilinomo kapiya gabonomodo tuputupupima꞉ midilinako, ebe gabo ebe Ya꞉suko nanitabokobi midi tanalola. k 31Ebema꞉ la꞉ ma kunu kemalagidilawitama, ale Godokono Totomu Tabamo tudila꞉o tanalo iyabaiamo gito kiyatimalema꞉? Ao, eba kunua꞉. Ale Totomu Tabamo tudila꞉o tanalo kawo tanalonomoma꞉ gelanama꞉, wiyasiya ale nanitabokobi midi tanalo kapiyado elawo kelaemalema꞉. l
Copyright information for
KNVFLY_RIVER